बी. रंगराव हे नाव महाराष्ट्रात व महाराष्ट्राबाहेरही देशातील इतर भागात सुपरिचित आहे. गेल्या चाळीस पंचेचाळीस वर्षांपासून ते सातत्याने मराठी व इंग्रजी या दोन्ही भाषेत लिहित आहेत. त्याच्या लेखनात दलित समाजाप्रति व आंबेडकरी विचारप्रणालीविषयी बांधिलकी व प्रतिबद्धता तर आहेच शिवाय मानवी जीवनाविषयीचा व्यापक दृष्टीकोण व सर्वसमावेशक जाणीव यांचाही वारंवार प्रत्यय येतो. त्यांची आतापर्यंत एकूण तीस पुस्तके प्रकाशित झाली असून, त्यातील अनेक ग्रंथांना प्रतिष्ठित पुरस्कारही प्राप्त झाले आहेत. महाराष्ट्रात वाड्मयीन जाणिवांची रेलचेल असली तरी या जाणिवा अनेक गटातटात विभागाल्या गेल्या आहेत. या जाणिवा अर्थातच, केवळ वाड्मयीन प्रवाहापुरत्या मर्यादित नसून त्यात लेखकांचे हेवेदावे व वैयक्तिक हितसंबंध गुंतलेले आहेत असा अनुभव आहे. बी. रंगराव मात्र या गटातटात सामील न होता स्वयंप्रेरणेने साहित्य निर्मिती करीत आहेत. ते कदाचित आजच्या मराठी साहित्यातील फार मोठं नाव नसतील, पण एक स्वतंत्र प्रज्ञेचा, दलित जाणिवा व आंबेडकरी विचारांना साहित्य कृतीतून प्रभावीपणे प्रगट करणारा सक्षम लेखक आहे हे मात्र निश्चित.