भारतीय व्यवसायामध्ये निश्चित आणि कायमस्वरूपी बदल कसा होऊ घातला आहे, याचा शोध अॅलन रॉजलिंग यांनी `बूम कंट्री?` या आपल्या पुस्तकात घेतला आहे. उद्योजक आणि भारताचे धोरण सल्लागार म्हणून अॅलन रॉजलिंग यांनी ३५ वर्ष काम केलं आहे. त्यामुळे त्यांच्या या शोधाला विशेष महत्त्व आहे. उद्योग आणि स्टार्ट-अप्सची नवी लाट, तंत्रज्ञानात झपाट्याने होणारी प्रगती, सरकारी पातळीवरच्या सुधारणा आणि जोखीम पत्करूनही होत असलेली भांडवल उभारणी या घटकांमुळे नवीन उद्योगांचं जाळं फार मोठ्या प्रमाणावर विस्तारत आहे, असं ते लिहितात. या सगळ्याचा परिणाम म्हणून सांस्कृतिक बदलही होत आहेत. विशेषतः तरुण पिढीला `वेगळं काहीतरी करून बघण्याची` इच्छा होत आहे. अॅलन यांचं स्वतःचं अनुभवविश्व समृद्ध आहेच. त्या जोडीला, त्यांनी आघाडीच्या १०० हून अधिक उद्योजकांच्या मुलाखती घेतल्या आहेत. त्यात पारंपरिक व्यावसायिक समूहांतील टाटा, महिंद्रा, बिर्ला, गोदरेज, पहिल्यांदाच उद्योग सुरू केल्यानंतर आता स्थिरावलेल्या पिढीतील सुनील मित्तल, किशोर बियानी आणि नारायण मूर्ती आणि नवीन पिढीतल्या आधुनिक स्टार्ट-अप्समधील सचिन बन्सल, भाविश अगरवाल, विजय शेखर शर्मा यांचा समावेश आहे.