प्राजक्तानं लिहिलेल्या अनेक कवितांपैकी निवडक कविता या संग्रहातून सादर केल्या आहेत. आपल्या कवितांचा संग्रह प्रकाशित करण्याचा प्राजक्ताचा हा पहिलाच प्रयत्न ! परंतु, या कविता वाचल्यानंतर लक्षात येतं की तिचं हे पहिलं पाऊल दमदार आणि भावी अपेक्षा निर्माण करणारं आहे. तिनं मनःपूर्वक प्रयत्न केला आणि पुरेसा वेळ दिला तर पुढील वाटचालीची सुप्त बीजं या संग्रहात आहेत, हे मुद्दाम नमूद करावंसं वाटतं. कवितासंग्रहाचं `प्राजक्तप्रभा` हे शीर्षकही या संग्रहासाठी अन्वर्थक आहे.एक अभिनेत्री म्हणून प्राजक्ता, रोजच्या जीवनात विविध अनुभवांना भिडत असते. असे अनुभव आपल्या सगळ्यांनाच येत असतात. It was always in the air, she happened to inhale it! तिचं संवेदनाक्षम मन त्यावर व्यक्त होतं. ते कवितेच्या रूपात प्रतिबिंबित होतं. नक्की कशी आहे तिची कविता? ती बंदिस्त छंदात बसणारी नाही, ती साधी यमकीही नाही. तिची काव्यात्मकता एकाच क्रियेत आहे, की ती तुम्हाला भिडते. स्त्रीजन्माच्या निरंतर वाट्याला आलेली असीम दुःख, करुणा, मातृत्व, वात्सल्य, प्रीती, उत्कट शारीर भावभावना आणि आदिम-अनंत सहनशीलता वगैरेही ती नाही. या साऱ्याच्या पलीकडे जाऊन gender-neutral आहे.