मी जुलै १९६६ मध्ये मराठवाड्यातून म्हणजे कंधार (जि. नांदेड) येथून महाडच्या डॉ. बाबासाहेब आंबेडकर कॉलेजात मराठी विभागात व्याखाता म्हणून आलो. औरंगाबादच्या मिलिंद महाविद्यालयात शिकत असतानाच चां. भ. खैरमोडे लिखित `डॉ. बाबासाहेब आंबेडकर चरित्र खंड ३` हा ग्रंथ मी दोन-तीन वेळा वाचला होता. या खंडात `महाडच्या मुक्तिसंग्रामा`चा समग्र इतिहास आलेला आहे. तेव्हापासून मला महाडचे आकर्षण वाटत होते. एक साहित्याला वाहिलेले मासिक म्हणून त्या वेळी `सत्यकथा` मासिकाचा खूपच दबदबा होता. त्याच काळात `सत्यकथे`मधील `जिथे उथव येते` हा महाडच्या संदर्भातील प्राचार्य रा. भि. जोशी यांचा लेख वाचला होता आणि हे आकर्षण कुतूहल खूपच वाढले होते. १९६३ साली एम्. ए. झाल्यावर मिलिंद महाविद्यालयातील मराठीचा व्याख्याता म्हणून मुलाखतही दिली होती, पण त्या जागेवर दुसऱ्याचीच नियुक्ती झाली होती आणि मी कंधारच्या शिवाजी कॉलेजात रुजू झालो होतो. दरम्यान पीपल्स एज्युकेशन सोसायटीचे तेव्हाचे अध्यक्ष डी. जी. जाधव यांचे मला असे पत्र आले की, `तुमची तयारी असेल तर तुम्ही महाडला जा` आणि त्याच क्षणी प्रा. पुंडगे, प्रा. चापोलीकर यांच्याशी चर्चा करून मी महाडला यायचे निश्चित केले. - झुंबरलाल कांबळे