डॉ. दिपक म्हैसेकर, IAS (Rtd.) भारतीय प्रशासकीय सेवेतील निवृत्त अधिकारी असून, त्यांनी महाराष्ट्र शासनामध्ये ३२ वर्षांहून अधिक काळ विविध महत्त्वाच्या जबाबदाऱ्या पार पाडल्या आहेत. प्रशासकीय अधिकारी म्हणून दुष्काळ, पूर आणि भूकंपासारख्या नैसर्गिक आपत्तींना तोंड देण्याचाही त्यांना अनुभव आहे. त्यांना प्रशासनाचा विविधांगी आणि सखोल अनुभव आहे. सेवानिवृत्त होण्याच्या केवळ पाच महिने आधी महाराष्ट्रात, पुण्यात कोव्हिडचा पहिला रुग्ण आढळल्यापासून ते पुणे विभागाचे विभागीय आयुक्त म्हणून या लढ्याचे नेतृत्व करत होते. जुलै २०२०मध्ये ते निवृत्त झाले असले, तरी मुख्यमंत्र्यांचे कोव्हिडविषयक सल्लागार म्हणून त्यांचा कोव्हिडशी लढा आजही चालूच आहे. सध्या ते महाराष्ट्राचे माननीय मुख्यमंत्री उद्धवजी ठाकरे यांचे सल्लागार आहेत. तसेच कोव्हिड दस्तावेजीकरणाच्या संघाचे ते प्रमुख निमंत्रक आहेत. याव्यतिरिक्त राज्य पर्यावरणीय परिणाम मूल्यांकन समिती (स्टेट एनव्हायर्नमेंटल इंपॅक्ट असेसमेंट कमिटी) (मुंबई आणि कोकण वगळून उर्वरित महाराष्ट्र) चे ते अध्यक्ष आहेत.