ब्राह्मणांनी ब्राह्मणेतर जातींना नीच लेखणे हा तर मनुवादच आहे परंतु मराठ्यांनी मराठेतरांना नीच लेखले तर त्यास काय म्हणावे ? महारांनी मांगांना नीच लेखले किंवा चांभारांनी ढोरांना नीच लेखले तर त्यास काय म्हणणार ? मी स्वतः शोषणमुक्त होईन आणि इतर सर्वांनाही शोषणमुक्त करीन, अशी भूमिका असावी. शोषण करू देणार नाही आणि शोषण करणार नाही, अशी प्रतिज्ञा हवी. सर्व शोषणग्रस्तांना एकजुटीत आणण्याची रणनीती हवी. माझे शोषण तेवढे सर्वात वाईट. ते अगोदर नाहीसे व्हायला हवे. इतरांच्या शोषणाचे नंतर पाहता येईल. माझे शोषण नाहीसे करायला इतरांनी मदत केली पाहिजे. तो माझा हक्क आहे परंतु त्या इतरांचे शोषण नाहीसे करायला मात्र मी मदत करणार नाही, अशी भूमिका उपयोगी ठरत नाही. आर्थिक विषमतेविरुद्ध मी लढेन परंतु सामाजिक विषमतेविरुद्ध मी लढणार नाही, ही रणनीती योग्य नव्हे. आम्ही स्त्री-पुरुष विषमतेविरुद्ध लढणार नाही ही रणनीती योग्य नव्हे. आर्थिक, सामाजिक, स्त्री-पुरुष अशा सर्व विषमतांविरुद्ध एकत्र संघर्ष करण्याची रणनीती हवी. एक विषमता दुसऱ्या विषमतेला पोषक असते. मी स्वतः गुलाम राहणार नाही आणि कुणाला गुलाम करणार नाही, अशी भूमिका घेतल्याशिवाय गुलामी नाहीशी कशी होणार ? - शहीद कॉ. गोविंद पानसरे