सम्राट अशोकानंतर सर्वात मोठे साम्राज्य उभारणारा, काळावर मात करणारी भव्य निर्माणकार्ये करणारा, पश्चिमोत्तर भारतातून अरबांना हरवत सुदूर तोखारीस्तान (उत्तर हिंदुकुश) जिंकून घेणारा, तत्कालीन बलाढ्य सत्ता विस्तारवादी तिबेटलाही वारंवार हरवणारा, तोखारीस्तानमधून चीनला जाणाऱ्या आंतरराष्ट्रीय व्यापारी महामार्गांवर स्वामित्व मिळवणारा, तत्कालीन चीनलाही मुत्सद्दीपणे शह देणारा आणि कनौजचा सम्राट यशोवर्मनलाही पराजित करत अर्ध्या देशावर आपली सत्ता कायम करणारा आणि एवढी अलौकिक कार्ये करुनही इतिहासाने कृपणतेने अत्यंत दुर्लक्षित ठेवलेला, आठव्या शतकात होऊन गेलेला काश्मीरचा सम्राट म्हणजे - ललितादित्य मुक्तापीड ! सुप्रसिद्ध साहित्यिक आणि इतिहास संशोधक संजय सोनवणी यांनी ललितादित्याचे सखोल संशोधन करुन उजेडात आणलेला आणि काश्मीरी जनतेशी सौहार्दाचे नाते जोडणाऱ्या `सरहद` तसेच `चिनार पब्लिशर्स` द्वारा प्रकाशित झालेला हा विलक्षण इतिहास !