श्री. य. गो. जोशी यांनी मला `वादविवेचन मालेत` `अनीश्वरवाद` लिहिण्याची विनंती केली होती. मी त्यांस म्हटले की, अनीश्वरवादाला `जडवादा` वाचून मुळीच महत्त्व नाही. एकाच वादाच्या जडवाद व अनीश्वरवाद या दोन बाजू आहेत. जडवाद ही विधायक (Positive) बाजू असून अनीश्वरवाद ही अभावात्मक (Negative) बाजू आहे. म्हणून जडवादाचे अंग म्हणूनच अनीश्वरवाद मी लिहू शकेन. त्याप्रमाणे त्यांनी मान्यता दिली. विधायक कल्पनेवरच अभावात्मक कल्पना अवलंबून असते. जडवादाची विधायक विचारसरणी बरोबर व निश्चित लक्षात घेतली म्हणजे त्यातून अनीश्वरवाद आपोआप सिद्ध होतो. जड़वादाची किंवा विज्ञानाची (Science) बौद्धिक भूमिका ज्याच्या नीट लक्षात येईल, त्याच्या बुद्धीत ईश्वराला भूमी मिळूच शकत नाही. मिळाल्यास ती एक बाकीच्या व्यवस्थित विचारसरणीशी विसंगत असलेली व परंपरागत श्रद्धेने राखून ठेवलेली कल्पना होय, असेच म्हणावे लागेल.