क्रिकेट, सिनेमा आणि राजकारण हे कोणत्याही सर्वसामान्य भारतीय माणसाचे आवडते विषय. या विषयावर बोलताना प्रत्येकजण त्या विषयातील तज्ज्ञ असल्यासारखा भाष्य करतो. मात्र `इलेक्शन बिलेक्शन` या पुस्तकात लेखकाने निवडणुका आणि राजकीय घडामोडींवर अतिशय चिकित्सकपणे आणि अभ्यासपूर्ण भाष्य केले आहे.१९५२ ते २०१९ या सुमारे सत्तर वर्षांचा निवडणुकांचा लेखाजोखा मांडताना लेखक हिरालाल पगडाल यांनी सतरा लोकसभा व पंधरा विधानसभा निवडणुका केंद्रबिंदू मानून हे पुस्तक लिहिले आहे. पुस्तकात `गल्ली ते दिल्ली` पर्यंतचे अनेक संदर्भ आहेत. केवळ निवडणुकीतील उमेदवारांची नावे, मतदानाची आकडेवारी न देता त्या-त्या निवडणुकीची पार्श्वभूमी विषद करताना लेखकाने जे ऐकले, वाचले आणि बघितले त्या सगळ्याचा सार या पुस्तकात दिसून येतो. निवडणुकीच्या राजकारणात अगदी छोटे-छोटे मुद्दे कसे परिणामकारक ठरतात, हे वाचताना नकळतपणे भारतीय मतदाराचे मानसशास्त्रही उलगडत जाते. - हिरालाल पगडाल