नाशिकच्या नाट्य क्षेत्रात नानाविध प्रयोग करणारी तरुण मंडळी अलिकडच्या काळात मोठ्या जोमाने काम करीत आहे. वेगवेगळ्या स्पर्धांबरोबरच नाट्य रसिकांच्या मनावरदेखील या नाट्यलेखक मंडळींनी आपल्या नाट्यलेखनाची छाप कायम केली आहे. ज्ञानपीठ पुरस्कारप्राप्त नाटककार वि. वा. शिरवाडकर, वसंत कानेटकर या दिग्गज नाटककारांच्या भूमीत नाशिकची रंगभूमी आजही कार्यशील ठेवण्यात या नवीन दमाच्या नाट्यलेखकांचे, नाट्यदिग्दर्शकांचे, कलावंतांचे योगदान महत्त्वपूर्ण आहे. विवेक गरुड, भगवान हिरे, दत्ता पाटील, श्रीपाद देशपांडे, सुधीर कुलकर्णी या नाटककारांनी समकालाचे अचूक भान आपल्या नाटकांतून पकडण्याचा प्रयत्न सातत्याने केला आहे. या सर्व नाट्यलेखकांच्या पुरस्कारप्राप्त निवडक एकांकिकांचा हा संग्रह नाशिकच्या या नाटककारांना महाराष्ट्रभर ओळख निर्माण करून देण्यात नक्कीच सहाय्यभूत ठरेल असा विश्वास वाटतो. प्रा. डॉ. विवेक खरे यांनी केलेले प्रस्तुत संकलन आणि संपादन नाट्यकर्मी व नाट्यरसिक यांच्यासाठी एक महत्त्वपूर्ण दस्ताऐवज ठरेल यात शंका नाही.