सावित्रीबाई फुले पुणे विद्यापीठाच्या मानव्यविद्या व समाज विज्ञान शाखांतर्गत इतिहास विषयाच्या तृतीय वर्ष कला (जनरल पेपर ३) वर्गासाठी असलेले विसाव्या शतकातील जगाचा इतिहास (१९१४ - १९९२) हे पुस्तक आपल्यासारखे सुज्ञ वाचक व राजहंस विद्यार्थी वर्गाच्या हाती देताना मला आनंद होत आहे. विसाव्या शतकाची सुरूवात ही पहिल्या जागतिक महायुध्दातून झालेली आहे. या युध्दामुळे जागतिक शांतता, सुरक्षितता व विश्वकल्याण ह्या गोष्टीतर दूरच राहिल्या उलट पुन्हा युध्दमय परिस्थिती निर्माण झालेली होती. अशा परिस्थितीवर नियंत्रण ठेवण्यासाठी आंतरराष्ट्रीय स्तरावर स्थापन झालेल्या राष्ट्रसंघाने शांततामय मार्गाचा वापर केला. ह्या सर्वांची माहिती प्रकरण दोनमध्ये दिलेली आहे. तत्पूर्वी पहिल्या प्रकरणामध्ये बारा संकल्पनांमधून जागतिक भांडवलशाहीपासून ते मानवतावादापर्यंतच्या विचारांची माहिती दिलेली आहे. तिसऱ्या प्रकरणात रशियन राज्यक्रांतीला पुरक असलेल्या सामाजिक, आर्थिक व राजकीय पार्श्वभूमीचा आढावा घेतला आहे. आधुनिक युगात उदयाला आलेल्या साम्यवादी तत्वज्ञानावर आधारलेली पहिली क्रांती म्हणजे रशियन राज्यक्रांती आहे.