`एका शिकारीची गोष्ट` हे पुस्तक वाचून हादरून गेलो. या पुस्तकाची वेगवेगळी रूपं आहेत. एक आहे चित्तथरारक रहस्य कथेसारखं उत्कंठा वाढवत नेणारं. आणि दुसरं म्हणजे राजेंद्र केरकर या माणसाचं काम, कामाची पद्धत, त्याचे पर्यावरणीय महत्त्व... हे सांगणारं... राजेंद्रवर मी काही वर्षांपूर्वी लिहिलं होतं. माझ्या लेखाचा भर त्याने खाणमालकांविरूद्ध दिलेला लढा हा होता. पण आता या पुस्तकातले वाघ प्रकरण वाचून हादरलोच. ती घटना राजेंद्रने दिल्लीपर्यंत पोहचवली. एकच गदारोळ. राजेंद्रच्या कुटुंबावर बहिष्कार..... सगळ्यात थरारक प्रसंग म्हणजे राजेंद्रला देवळात बोलावले तो. तिथे राजेंद्रच्या आयुष्यभराच्या कामाचा, मूल्यनिष्ठेचा, सगळ्याचा कस लागला होता. हे धैर्य म्हणजे राजेंद्र. असे राजेंद्र ठिकठिकाणी निर्माण व्हावेत, ही एक वेडी इच्छा.