`उभं आडवं`मधून राहुल कोसम्बी यांचे विवेचनपर गद्य प्रथम पुस्तकरूपाने मराठी वाचकांसमोर येते आहे. या ताज्या दमाच्या लेखनातून सामाजिक-राजकीय- सांस्कृतिक भानाची ऊर्जा ओसंडून वाहते आहे. भोवती पडणाऱ्या घटितांचे खोलवरचे विश्लेषण हा या लेखनाचा महत्त्वाचा विशेष आहे. राहुल कोसम्बी शोषितांच्या प्रत्यक्षातील जगण्यावर लक्ष केंद्रित करतात आणि या मूर्त परिस्थितीच्या संपर्काति आपला सैद्धान्तिक व्यूह आणतात. प्रत्यक्ष वास्तव आणि सिद्धान्तव्यूह यांची अशा प्रकारे सांगड घातल्यामुळे राहुल कोसम्बी यांचे विवेचन असांकेतिक रीतीने जिवंत, व्यामिश्र आणि सामाजिक जीवनाच्या विविध स्तरांवर प्रकाशझोत टाकणारे झाले आहे.अपारंपरिक आणि निर्भय अशी, स्वच्छ, सुस्पष्ट आणि तडजोडी न करणारी डावी भूमिका `उभं आडवं`च्या केंद्रस्थानी आहे. ती चुकूनही सोयी, गैरसोयी आणि तडजोडी यांचा विचार करीत नाही. यामुळेच राहुल कोसम्बी यांच्या लेखनात रोखठोक निर्भीड परखडपणा आलेला आहे. शोषण जन्माला घालणाऱ्या परिस्थितीचे आव्हान स्वीकारून इतिहासाने निर्माण केलेल्या कोंडीतून मार्ग काढण्याची कृतिशील जाणिवेच्या पातळीवरील हिमत है राहुल कोसम्बी यांच्या लेखकीय व्यक्तिमत्त्वाचे महत्त्वाचे परिमाण आहे.